خماسيات الطابور

))1((
مين يعرف الرحمه ومعناها
يامصر يا ام الضيا والنور
يا كاس وداير علي العباد
القلب منك قوي مكسور
ابنك وجالك يشتكي
من يوم ميلاده واقف طابور
واقف مكانه مش لاقي غيره
يرجع له مهما يلف يدور
عشان رغيف بياكله حاف
او حتي رخصه من المرور

2

متكدر في حياتي معاكي
وطريقي كله مطبات
اخلص من واحد للتاني
واتاريني بعيد اللي فات
المتر في ارضك ميت كيلو
وكأني بطئ الخطوات
طاير او راكب او ماشي
ديما بتطول المسافات
اليوم تحت سماكي سنين
والثانيه بتعدي ساعات

3

عشان ادوق العيش
لازم ابات في طابور
عشان اخلص جيش
لازم اتوه في طابور
وعشان بحبك لازم
امشي في طريق مهجور
ولو ارحل عن سماكي
دمي اكيد مهدور
ولأني مش حرامي
حقي انا مهبور